Mijal salo Meghalaya sorkarini cabinet tom·enba bang·a kamrangko re·chakatna aro dingtangatanirangko dakangaha. Iarangni gisepo, Govt. Lower Primary School (LP) skigiparangna promotion ba kamni gadangko nambate ra·doatna man·agita Meghalaya School Service Rules 2025-ko cabinet ra·chakangaha.
Batanggimin chango ja·rikbaenggipa service rule, LP school skigiparang aro Assistant Teacher-rangko uamangni kamni gadangko ra·doatna cholrang komia. Ia service rule-ko ja·rikanichi bang·a skigiparang apsan gadango donkamna nangao ga·aka.
Ia gitalgipa niam, skigiparangni neng·nikanirangko namdapatna aro bida pakwatenggipa manderangna kamtangtango nambate dakna cholko ra·bana miksongenggipa ong·a.
