College of Post-Graduate Studies in Agricultural Sciences, Umiam, Ri-Bhoi a·jao re·baenggipa January 27-oni 29 tarikona ong·nasienggipa National Symposium on “Threads of Heritage: Exploring Traditional Textiles and Natural Fibres” ni official poster-ko College of Community Science, CAU (Imphal) Tura-o mijal salo oprake on·aniko dakangaha. Symposium-ko dingtang mancha College of Community Science, CAU Tura baksa ICAR-NINFET Kolkata, ICAR-CICR Nagpur, Deendayal Research Institute aro ICAR-CRIJAF Barrackpore apsan nangrime ong·atgen.
Ia symposium-ko ong·atanichi India a·songo textile ba kildingchi ba·ra doke tarianiko ma·sie ra·na, fibre bikotani baikamgipa cholrang aro karkanarango ka·e tangka paisa man·ani cholrangkoba u·ie ra·na dakchakaniko on·gen. India a·songo dakrongbaenggipa mongsongbate Northeast a·dokrango te·rik, anaros, wa·a aro gil·matoniko fibre bikotani bidingo chanchirimaniko dakanggen. Ia symposium-ona u·i ma·sigiparang, changgipa sapgiparang aro policy tarigiparang sokbatokgen jeon uamang chasongoni dakbaenggipa textile-ko bikotani bidingrango ma·sie ra·na jotton ka·gen.
Program-o College of Community Science Tura-ni Dean Dr. Jyoti Vastrad, natural fibre chong·motan a·gilsako man·gipa bosturangoniko kildingoniko ba·ra doke tariani gamchataniko aganangaha. Ua dingtang mancha India asongo maikai iako dakanichi janggi tangao tang·doaniko ra·baani, baikamgipa cholrang aro a·gilsak gimikona bading chiwalaniko sokatna bil man·ani bidingo aganangaha. Ia symposium, changgipa sapgiparangko aro researcher-rangko apsan biapona chanchirimna sokatgen aro entrepreneur-rangna didianiko aro ia a·bao baikamgipa ong·na dakchakgen ine Jyoti Vastrad agandapangaha.
Symposium-ona changgipa sapgiparangni agangrikani, dake skie mesokani, ma·manti bosturangko tarina changgiparangko u·ie ra·e uamangni changa sapanirangko namdapatna, me·chikrangni bilakaniko aro zero waste-ko ja·rikani bidingo India a·songni niksamsoe donsogimingita program-rangko ong·atanggen. Ia symposium-ona sol·na repna, sikna kona changgiparangko, karkanani kamko ma·sigipa aro chatro chatrirangkoba re·bae bako ra·echina didiataha.
