Da·al salo South Garo Hills, Chokpot Civil Sub-Division-ni ning·o ma·mongni scheme-rang jekai JJM, PMGSY aro MGNREGS-ni kam ka·anirangko u·ie ra·na tom·aniko dakangaha. Ia tom·anio Tura-ni MP Saleng A. Sangma baksa SDO P. R. Sangma, BDO J .N. Sangma aro MPCC-ni Working President Deborah Marak-ba dongpae bakko ra·angaha.
Ia tom·anio SGH Chokpot Civil Sub-Division ni ning·o ma·mongni scheme-rangko ka·na nangchongmotenganiko ma·sina man·aha. Chokpot Sub-Division ni jolrango mongsongbate JJM-ko kam ka·anio namdapatna nangkuaniko Saleng Sangma daito gnanggiparang baksa chanchirimaha. Ia jolrango ma·mong scheme-ni namgniko man·agita name nirokchinaba u·iatangaha.
South Garo Hills, Ampangdamgre-ni Jawaharlal Navodaya Vidyalaya (JNV) School-oba Principal, skigiparang aro chatro chatrirang baksa neng·nikanirangko ma·sie ra·na tom·aniko dakangaha. School-o skie ra·aniko dontonggija aro chu·onge ka·na man·agita pilak kamrangko matchotatchinaba didiangaha.
Rongara C&RD Block-o tom·anio ma·mongni scheme-rang mongsongbate MGNREGS aro PMGSY program-rangko nirokani bidingo chanchirimangaha. Saleng Sangma ia scheme-rangni pilak kam ka·anirang aro namroro silroroani gimin tom·anio u·iataniko dakangjolaha.
