South Garo Hills, Siju Constituency-o ge 123 project-rangko matchotgija donchipe galani a·sel GHADC-ni CEM Albinush R. Marak, Executive Member Secretary Rikse R. Marak, sak 21 contractor aro GHADC-o kam ka·enggipa staff-rangni kosako social activist Nilberth R. Marak aro Flaming B. Marak Meghalaya Lokayukta-o mokordoma ka·doangaha.
Meghalaya Lokayukta-nigita Lokayukta-ni Prosecution Wing-ni Director-ko da·o ong·enggipa CEM, gitcham Secretary, GHADC-ni gitcham Superintendent Engineer aro contractor-rangoniko sing·sandianiko dake report-ko tarie on·china ge·etangaha. Adita bilsirango chong·motan 2020-oni 2023-ona GHADC Executive Committee-ni Secretary, South Garo Hills-ni Siju Constituency-ona bang·a project-rangko ra·baaha. 2020 bilsio ge 20 project-rang gnang, 2021-o 23 project, 2022-o ge 63 project aro 2023-o ge 13 project-rangoni mitamko tarigija galchipa, mitamko galchiptela aro mitamko matchota gri gale donengako nikna man·aha.
Ia project-o contractor kam ka·enggiparangna kam matchotja skalde aro completion certificate-ko man·ja dipet paisako kam ka·na skang on·ani niam dongjagenchimoba project-o niatode contractor-rang 60% mangnigita kamko matchota gri tangkako bikotaha. Unbaksana, re·ange nigija contractor-rangna kam matchotani certificate-ko Superintendent Engeneer on·aha ine u·ina man·aha.
Bon·kamgipa tangkako bikotnagita CEM, gitcham Secretary aro GHADC-ni engineer an·tangtangan ra·chakaha. Uamang ia kamo jak dongani gimin uamangni kosako sing·sandianiko dakchina mokordoma ka·angaha ine social activist Flaming B. Marak u·iataha.
