Chief Minister Conrad Sangma, a∙dokni sanna bannaniko namdapatna aro sanchakgipa nokrangni rika cho∙aniko tang∙doatna Health Department baksa tom∙bimonge chanchirimangaha. Ia tom∙bimonganio a∙dokni Health Minister, Dr. Ampareen Lyngdoh, Health & Family Welfare (H&FW)-ni Principal Secretary Sampath Kumar, H&FW-ni Secretary Ram Kumar aro gipin official rang bakko ra∙angpaaha.
Sanchakram biaprango sanna bannaniko namdapatna specialist cadre system ba dingtang mancha changgipa sapgiparangko Medical Department-na ra∙bae on∙a jotton ka∙anggen ine Sangma ku∙watangaha. Pilak sanna bannaniko on∙enggiparang uamangni nanganirangko aro dakna nanggnirangko u∙iatnagita a∙dok sorkari Procurement logistics and equipment dashboard ko ra∙gate on∙aha. Iako da∙o a∙doko jakkalangna a∙bachengataha ineba Sangma janapangaha.
Sangma, songni manderang baksa sanna bannaniko dakenggiparang altuae agangrikna aro dingtang dingtang nanganirangko u∙iatna Village Health Council ko bikotna chanchienga ine parakangaha. Ia kamrangchi manderangna dangdike on∙anio mikkangchina sanna bannani a∙bao dingtanganiko ra∙bagen ine Sangma ka∙dongani kattarangko aganangaha.
