College of Post-Graduate Studies in Agricultural Sciences, Umiam, Ri-Bhoi a·jao January 27-oni 29 tarikona ong·atanggipa National Symposium on “Threads of Heritage: Exploring Traditional Textiles and Natural Fibres”, mijal salo Valedictory Ceremony-ko ong·atenba name matchotangaha. Symposium-ko, College of Community Science, CAU Tura baksa ICAR-NINFET Kolkata, ICAR-CICR Nagpur, Deendayal Research Institute aro ICAR-CRIJAF Barrackpore apsan nangrime ong·ataha.
Valedictory Ceromony-ona CAU (Imphal) ni gitcham Vice Chancellor, Dr. S. N. Puri mongsonggipa ong·e sokbaaha. Unbaksa, Dr. Indira Sarengtham (Director of Instruction, CAU, Imphal), Dr. L. M. Garnayak (Director of Research, CAU, Imphal), Dr. Y. G. Prasad (Director, ICAR-CICR, Nagpur), aro Dr. D. B. Shakyawar (Director, ICAR-NINFET, Kolkata) mande ra·e okamatako man·e program-o bakko ra·angaha.
Ia symposium-ko India a·songo textile ba kildingchi ba·ra doke tarianiko ma·sie ra·na, fibre bikotani baikamgipa cholrang aro karkanarango ka·e tangka paisa man·ani cholrangkoba u·ie ra·e dakchakaniko on·a miksonge ong·ataha. India a·songo dakrongbaenggipa mongsongbate Northeast a·dokrango te·rik, anaros, wa·a aro gil·matoniko fibre bikotani bidingo chanchirimaniko dakangaha. Ia symposium-ona u·i ma·sigiparang, changgipa sapgiparang aro policy tarigiparang sokbatokaha jeon uamang chasongoni dakbaenggipa textile-ko bikotani bidingrango ma·sie ra·angaha aro uko ripingna, namdapatna aro bakroatna chanchirimangaha.
Mongsonggipa ong·e sokbagipa, CAU (Imphal) ni gitcham VC,p Dr. S. N. Puri, program-o aganengon, Vice Chancellor, Dean aro uamangni dolrangko ia dal·gipa Symposium-ko ong·ate name matchotatanina mittelangaha. Ua Northeast a·dokrango kilding bikotaniko chasongni ja·rikbaaniko janapange chadamberangko ia kamo bak ong·atchina aro ITI college-rango changa sapaniko namdapatna cholrangko bikote on·china aganangaha. Unbaksa aro gipin mongsonggipa sokgiparangba iani a·bao namdapaniko ra·bana aro chadamberangna, songni nokni manderangna cholrangko tarie on·china uamangni agananirango didiangtokaha.
Ceremony-ni bon·chotao CAU Tura-ni Dean, Dr. Jyoti V. Vastrad sokbagiparangko, kamchi jakchi on·gilgiparang aro bakko ra·gipa sakantiko mittelangaha. Ia symposium-ko ong·atanichi an·chingo man·enggipa textile ba fibre-rangko ripingna nangani gamchataniko, chong·motan skichakram, Industry aro bosturangko tarina changgipa sapgiparangko ku·cholsan ong·e kam ka·na didianiko on·angaha.
