New Tura TVS showroom-oniko Ntorg 125 scooty-ko sale nina ine dakmikenba cha·una jotton ka·gipa bilsi 23 ong·gipa Sengdobirth T. Sangma-ko police dolrang rim·na man·aha. Ua showroom-ona sokbae an·tangni bag ra·bitgipao document-rang donga ine pasikenba scooty-ko sale nina biaha jeon showroom-o kam ka·enggipa staff-ba una ka·donge sale nina on·aton ua sokbachipjaha. Ja·mano bag-ko kulie nion ning·ao mamingba donggijako ma·sina man·skaaha.
Showroom-ni Manager, ia mandeni kosako Araimile Beat House-o badi ka·doaha jeon police dolrang CCTV-oniko nike cha·ugipako ma·sina man·aha. Police dolrang mokor doma ka·a bikan am·sandina a·bachenge Rongram police thanani ning·o man·gipa Migre songoniko rim·na man·aha aro scooty-koba man·pilaha. Cha·uani sal ia antini Mongolbar attam walni 9:30 bajimango ong·aha.
Sangma, uni cha·ugimin scooty-ko Assam a·dokni number plate gitchamchi bodolnaba jotton ka·aha. Ia am·sandianio Tura police dolrang bol 10-na bate gipin cha·ugimin bike-rangkoba man·aha.
