Tura songjinmao pagipa saksako denggu dakgipa sakdok manderang silchidarerangko ra·e so·otna chadrapaha. Ia obosta Walbakgre antioni adita re·e Badagonggre songona re·gipa ramao Bristibar attampang 6:30 bajimango ong·aha. A·selko chagronggipa mande Chandagre songoni ong·a.
Uni agananigitade, uko chadrapgipa manderang sakdokmang gnang aro uamangoni sakbri silchidarerangchi be·eno su·protna jotton ka·aha ine parakaha. An·tangko naljoknagita ua jaktangchi ra·chakaha jeon ua jakpao mata bu·aniko man·skaaha. Uni bimingko mingen denggu dakgiparang uko sing·aha aro tangka paisa ba phone-ko ra·na am·gija rang·san so·otnasa chadrapaha ine ua aganangaha. Janggitangna dakgrikengmitingo gari bolsa re·baani ja·manosa manderang uko watgale katangtokaha.
Manderangko darangkoba ua ma·sirikjaha indiba bilsi 27-28 rangni ong·genok ine ua chanchichipe aganangaha. Ia denggu dakgiparangni kosako ua mokordoma ka·dokujaenga, indake ong·genchimoba social media-o gipangahani gimin obostani bidingo sing·sandianirang nadoaha.
Apsan ramaon batanggimin changoba ia songoni mande saksako chadrapa dongaha. BSF camp-ni joloba hajira kam ka·gipaoniko attampango noktangchi re·bapilmitingko tangka ra·sruke cha·ani koborrangko re·anggipa somoirango knaangaha. Iasan ong·aigija Walbakgre jolni dokanrangoniko bosturang aro tangkarangko cha·ugiparangba bang·en dongaha.
