A·doko koela cho·aniko daktaina ge·gittam project-rangna meligrike soi ka·ani ja·mano chonchongipa koela cho·anirangko ka·sine agangrikaniko dake a·palatanggen ine Chief Minister Conrad Sangma u·iataha. Ia ge·gittam project-rangko West Khasi Hills-ni Pyndengshalang, East Jaintia Hills-ni Sarynkham aro East Jaintia Hills-ni Lumiakhi Wahsarang koela cho·chakgipa a·damrango koela bikotaniko daktaina Government of India, Controller of Coal baksa a·dok sorkari soi ka·angaha.
Ian dingtangmancha a·dok sorkarina ra·bie kamko ka·aniba ong·enga, niamko ja·rike koela bikotanirangko chalaina ku·rachakani ja·mano chonchongipa koela bikotanirangko dakgiparangna ja·ku ga·angskagen ine Chief Minister Conrad Sangma aganangaha. Gipin a·dokrango ja·rikagita Meghalaya a·dokoba koela bikotaianiko dakna 100 hectare a·arangko nangenga. Ia niamo pangchake chonchongipa koela bikotgiparangna chanchina sorkari kam ka·enga indiba ma·mong sorkari baksa agangolgrikna nangenga aro bargain ba damrangko sikchepna bil amkujaenga ine Sangma aganangkuaha.
Dam sikchepani bidingo aganengon, Meghalaya a·doko a·arangko a·kangani ba land acquisition-ni niamni dingtanganiko ma·mong sorkarina talatna nanga ine Sangma janapangaha. 100 hectare-oni 10 hectare ba una bate ra·onataniara ma·mong sorkari baksa dam dakna nangtaiani ong·gen ine Sangma parakangaha. Iako dakna re·mikkanggenchimode mamingkoba man·rikjanaba donga jean da·o koela cho·taina on·gipako nosto ka·ani ong·naba gnang ine Sangma agandapangaha.
Indake ong·genchimoba, re·baenggipa somoio ma·mong sorkarina janape, a·dokni 90% mangnigita chonchongipa koela bikotgiparangni namgnina a·arangni nanganiko komiatskagen ine Sangma ku·chakangaha. Ma·mong baksa golporimon rang·san dakaigija ka·sinsin re·mikkangna a·dok sorkari tik ka·aha aro je soi ka·gimingita koela bikotaniko a·bachenge, chonchongipa koela bikotgiparangkoba kamo ra·bapiltaina jotton ka·angkuna ine Sangma aganangkuaha.
