East Garo Hills, District Police Operation dolrang gitcham bobil dol dake chakatgipa bilsi 44 ong·gipa Silchanggittim-oni Mexbal K. Marak-ko silchidare baksa rim·aha. Marak-ko Menil ineba mingkilaka jean A·chik National Volunteers Council (ANVC-B) dolni ong·a. Sing·sandianirangko dake nion Marak-ko 2008 bilsio ANVC-B baksa bakrimaha aro 2015 bilsio an·tangko bame on·aha ine u·ina man·aha.
Police dolrang kakketgipa koborrangko man·enba Robibar salo am·sandianiko dakaha aro Marak-ko attam 4:45 mang somoio Rongjeng Police thanani ning·o man·gipa Baringgre Chambildam songoniko rim·aha. Uoniko, license donggijagipa 7.65 Chinese-made pistol ge·sako man·aha.
Ian East Garo Hills a·jao antio gnigipa changna donnugimin silchidarerangko man·enggipa ong·a. Adita salrangna skang AK slaini gulirangko aro mortar shell-rangkoba man·angaha jekon GNLA bobil dolni ong·gen ine chanchichipani gnang.
