South Garo Hills a·jao Silkigre PHC ni ning·o donggipa Rongchonggre Sub-centre ba Wellness Centre ko mijal salni bako Garo Enlightenment Society (GES) nirokeaniko dakangaha. Rongchonggre Sub-Centre ko batanggimin 2008 bilsio rikna matchotgenchimoba sub-centre ko a·bachengaonin name chalaigija indin galchipe donenga ine ua songo songdongenggipa manderang u·iatangaha.
Rongchonggre Sub-Centre ko a·dok sorkari aro HANS Foundation apsan bakrime chalaienga. Indake ong·genchimoba ia SC-o kam ka·enggiparang jekai ANM aro CHO rangna dongchakani biaprang dongjae Rongchonggre songni Community Hall aro school nok rangosa dongchakna nangao ga·aktokenga ine parakataha. Una agre sanna bannani bosturangkoba sub-centre o dongija community hall kosa bostu dona jakkalskaanikoba u·iatangaha. Indakgipa neng·nikanirangko chagrongani a·sel songni nokni dilgiparangna aro jako ra·e kam ka·enggipa officerrangna chang ni chang u·iataniko on·omangba maming ja·ku de·aniko nikna man·jaha ine GES u·iatangaha.
Rongchonggre songo nokking 30 na baten donga aro iano songdongenggiparang gipin biapchi sanna banna re·na nanggija Rongchonggre sub-centre o sannaniko dakna man·achim indiba indakgipa obostarangko chagrongani gimin gipin biaprangona re·esa sanna nangskaenga. Ia pilak neng·nikanirangko ta·rakale nirokatchina South Garo Hills ni Health Officer aro Health and Family Welfare ni Minister Ampareen Mazel Lyngdoh ko mol·molangaha. Iani gisepoba maming ja·ku de·aniko dakjagenchimode Indian Public Health Standards ni niamo pangchake ja·kuko de·angskagen ine Garo Enlightenment Society parakangaha.
