July 6 tarikoni Don Bosco, Rongkhon Tura-o chess competition-ko ong∙atanggipa Sonibar salni July 8 tariko matchotangaha. Ia chess kal∙susaaniko salgittamna Garo Hills Chess Association dolrang dokgipa changna ong∙atangaha. Bonkamgipa salo pilak che∙giparangna adita tangkarangko on∙angan baksa trophy aro certificate koba on∙angjolaha.
Garo Hills Chess Association-ni Executive Member saksani aganani gitade ia kal∙susaaniko bi∙sarangni namgijagipa dakbewalrangoni naljokatna gisik aro be∙enni an∙sengbaljokanina miksonge ong∙atangaha ine u∙iatangaha.
Ia kal∙susaanio skanggipa biapko Barbith M Sangma, gnigipao Silkam A. Sangma aro Gamrikra Marak gittamgipako man∙angskaaha. Ia kal∙susaanio Tura songjinmani adita school bi∙sarang, chadamberang aro ma∙aparangba gisik nangbee bak ra∙aniko nikangna man∙aha.
Ia competition-o chi∙gnigipa gadangona sokdogiparangko Ribhoi Umsning o ong∙atnasienggipa a∙dokni Chess Championship tournament-o Garo Hills gimikni palo kal∙nagita seokangskaaha.
