Assam-ni Chief Minister Himanta Biswa Sarma-ni University of Science and Technology Meghalaya (USTM) ko togigipa university ine matnanganiko Meghalaya sorkari aro USTM raken jegalataha. Sarma-ko uni agangipa kattarangna pangchakgipa sakkirangko on·chinaba u·iatangaha.
Meghalaya Education Minister Rakkam Sangma, USTM-ni kakketaniko parake ian ra·chakgimin state university ong·a jean pilak niam retiko ja·rike chalaienga ine aganangaha. Saoba iani kosako matnanga ong·ode sakkiko on·chinaba ua agandapangaha.
Chief Secretary DP Wahlang, apsandaken USTM-ko University Grants Commission (UGC) ni ra·chakgimin ong·a ine aganaha. USTM-ni on·gimin degree-rang UGC-ni ra·chakaniko man·e sokbaenga aro iani bidingo sing·doani ba togigipa ine aganani maming kattaan dongja ine Wahlang aganangkuaha.
Sarma-ni matnanganina USTM-ba jegalate 2011 bilsioni a·bachengaonin higher education, research aro social welfare-na on·gilaniko parakataha. Indakgipa matnanganirang university-na namgija bimingko ra·baa aro India a·songo chubatgipa gadango nirokenggipa daito donggiparangni kosako sing·doaniba ong·a ine USTM aganangaha.
USTM, NAAC A+ grade-ko man·gimin ong·a aro re·anggipa bilsio India a·songo ge 200 university-rangni gisepo rank-koba man·aha. Nature Index, research aro science-nigita on·gilanio USTM 52-gipa gadangko man·angaha. Kakketo pangchake golpogrikaniko dakna aro university-ni kosako maiba sing·sandianiko dakna nangode dakchina USTM dingtang mancha Sarma-na janapataha.
