Chokpot jolni NGO dolrang jekai GSU aro Chokpot Area Vigilance Committee (CAVC), unbaksa Nokmarang aro songni manderang jolo chirangna dilengani gimin Public Health Engineering Department-ni Sub-Divisional Officer (i/c) ko Chokpot PHE Office-o grongangaha. SDO baksa agangrikon uamang songni nokni pilak neng·nikanirangko janape Greater Water Scheme-ni bidingo sing·sandianirangko dakangaha.
Greater Water Scheme-ko 2022 bilsion a·bachengataha jean Chokpot jolo maming tang·doani aro kam ka·anirangko nikuengjaenganiko NGO dolrang janapataha. Uamangni u·iatanigitade SDO-ko grongon ua ia scheme-ko ta·rakbate kam ka·na aro ru·utgijaan matchotatna ku·chakangaha ine parakataha.
Chokpot-o PHE Office donggenchimoba batanggimin bilsi 20-oni Chokpot jolo name chi wataniko PHE department-oniko man·jaenganiko NGO-rang u·iataha. Songni nokni manderang Dareng chibimaonikosa nanganirangna jakkalna pangchakna nangenga. Uni gimin ia neng·nikanirangko nirokate scheme-ko ta·rake kam ka·china uamang jinmani palo Meghalaya sorkariko mol·molataha.
