February 28 tarik, Sukrobar pringo saksa me·chikmani manggisiko Meghalaya Rural Bank ni nalsao donggipa Barik gittimni PWD office sepangoniko man·aha ine police dolrang u·iatangaha.
Police rangni parakatanigitade, sianggipa mandeni saksa ka·rimska ia a·sel obostani bidingo u·iatangaha aro jensalo uko sing·sandianiko dakon ua an·tangan me·chikma ko so·otangaha ineba parakangskaaha. Ia obosta ara Sukrobar pringni 3 baji mangni somoio ong·angaha jeon uamang sakgnini gisepo adita jegrikaniona soke ua me·chikmako siltongchi sate siataona sokaha ine u·ina man·angaha.
Sianggipa mandeara Lawsohtun-o songdonggipa bilsi 40 ong·gipa me·chikma jean bi·sa sakgnini ma·gipa ong·a ine police dolrang parakataha. Dosi dakgipa mandeko da·o Shillong Sardar Police Station-o donenga aro name dake sing·sandianikoba dakangkuenga ineba parakangaha.
