Meghalaya Legislative Assembly budget session ni skanggipa salo, a·doko Eklavya Model Residential School (EMRS) ni gimin janapon ge 38 skulrangoni ge 13 skulrangni rika cho·aniko a·bachengatangaha jeoni EMRS Pahamsyiem ko name manchaan matchotaha aro EMRS Samanda ni rika cho·aniba matchotna bang·jaha ine Governor CH Vijayashankar aganangaha.
Ge 16 EMRS ni Detailed Project Report (DPR) ko tender ka·china raiko on·angaha aro bangki dongenggipa ge 7 EMRS rangna a·a nianiko dakangenga. Iana agreba ge 2000 skulrangni rika cho·anirangko Mission Education Initiative ni gita a·dok sorkari taridapenga ine Governor u·iatangaha.
Meghalaya a·dok NEP 2020 na tarisamsoani gita Meghalaya Future Ready TLM Kit (Jadui Pitara) ko sualna a·bachengataha jeon ge 3925 schoolrangni sak 92000 chatro chatrirang namgniko man·enga ine parakangaha.
A·dok sorkarini Meghalaya Vidya Samiksha Kendra ko a·bachengatanichi skigiparangni skul ka·aniko 30% oni 85% ona tang·doaha aro mid-day meal on·aniko 5% oni 95% ona tang·doatna dakchakaha ine Governor aganangaha.
Captain Williamson Sangma State University jekon adita salrangna skang nokdonggae on·gipako University Grants Commission ni gita skanggipa state university ine ra·chakaniko man·aha. State university baksa bakrimgipa collegerango porainagipa chatro chatrirang Under Graduation (UG) aro Post Graduation (PG) ko poraidapna Common University Entrance Test (CUET) ko sena nangjawa ineba Governor aganangaha.
