Winter Capital ko Tura-o songe on·china ru·uta bilsirangna dabienggipani bidingo manderangna nambate tale ma·siatna March 1 tarik, Sonibar salo A·chik State People’s Front (ASPF) South West Garo Hills ni Garobadha Merong Bajar gnigipa awareness campaign ko ong·atangaha.
Ia tom·aniko ASPF Garobadha Unit ni Secretary Salgra Sangma dilangaha jekon ASPF HQ Tura, Garoland State Movement Committee (GSMC) baksa bakrime ong·atangaha. Ia awareness campaign-o Nokma, NGO dolrang jekai FKJGP, APA, aro Garobadha jolni NGCO ba bakko ra·ange Tura-o Winter capital ko songna nangchongmotani bidingo chanchirimangtokaha.
A·dokni gitcham dilgiparangni ku·mikchetanggipao pangchake ia dabianiko chu·sokatchina sorkariko didiani kaatarangko Garobadha Circle FKJGP ni President Anderson M Marak aganangaha. Ia dabianiko bimang ong·atna apsan jakko on·e kam ka·angna A·chik Progressive Approach (APA) Garobadha Unit ni President Willat Ch Marak ba aganangaha. Winter capital ko songna adita nanggipa ku·monganiko aro mikkangchi krimkro ong·e kam ka·na man·agita manderangni jak on·a nanganiko GSMC ni Acting Chairman Balkarin Marak dingtang mancha didiataniko on·angaha.
A·chik a·songni manderangna iani gamchataniko ra·bae on·a Garo Hills ni MLA aro MDC rangkoba kang·kare ka·e skanggipao done ja·ku de·angchina ASPF HQ Tura ni Secretary aro Advocate Bernita Marak mol·molangaha. Garo Hills ni manderangni ka·donge dilgiparangko seoke watatanian ia dabianiko chu·sokatna nanganiko janape iani bidingo Assembly session-o janapchinaba Marak didiangaha.
