Chief Minister Conrad Sangma, ia bilsio a·doko bijoliko den·ani dongjawa ine mijal salo aganangaha. Meghalaya Energy Corporation Limited (MeECL), tangka paisanigita bilgrianiko man·genchimoba adita dingtanganirangko nikna man·enga ine Sangma aganangaha.
MeECL-na bilsirikatan gong crore 900 tangkarangko chamengani gimin fiscal ba gamna nangenggiparang namdaproroenganiko Sangma parakangaha. Ia tangkarangko skia poranio aro sanna bannanio namdapaniko jakkalna man·a, indioba ian MeECL-ko namdapatnasa dakenga ineba Sangma aganangaha.
MeECL-ni noksan ong·anioba tang·onani dongaha aro Aggregate Technical & Commercial (AT&C) ni noksan ong·anioba 18% mangnigita tang·onaniko Chief Minister parakangaha. MeECL-ni gamna nanganirango bang·en dongkuenganikoba ua janape bijoliko ja·pangoni name dake corporation watna man·enga ine aganangkuaha.
Power sub-station ni chu·onggijanikoba nirokate a·dokni dam 10 biaprango kam ka·chengna miksonganikoba Sangma parakangaha. Gital sub-station rangko bilsio jadokprako rikna miksongenganikoba Sangma aganangaha.
Iani gisepon, mijal salo a·doko bijoli jakkalgiparangna One Time Settlement (OTS) scheme-ko Power Minister AT Mondal-ni donganio a·bachengataha. Ia scheme-ni namgniko ra·china Sangma didiange, ian dingtang mancha bijoli jakkalanio gro donggiparangko olgrokatna ra·baaha ine Sangma parakangaha. Bijoliko jakkalgiparang 40% principal-ko game gitchaenggipa 60% ko instalment dake interest gri gamna man·gen ine Sangma talatangaha.
