Garo Hills ni ge∙sa YouTube o jawilwat tarianio niksengbaenggipa AMS FILM ni dolrang Sonibar salo Chandmari kalchakram aro wilwilao donggipa ramarangko rongtalataniko dakangaha. Uamang baksa adita chadambe ripengskarangba bakrimpae ia rongtalatanio gisik nangbee bak ra∙aniko nikangaha. Chandmari damsa rona rotogipa aro kal∙chakram biap ong∙anina AMS FILM ni dolrang uko rongtal an∙tale rakkipachina pilak chadambe aro ma∙aparangkoba mol∙molaniko dakangaha.
A∙dokni aro a∙jani rongtal an∙talanina dingtanganiko ra∙bana pilak songdongenggipa manderangko an∙tangtangni cha∙gipa ringgipa plastic ba jabolrangko skatang galjachinaba uamang didianiko on∙angjolaha. Mikkangchi nambate Chandmari-kosan ong∙aigija Tura songjinma gimikkon bakrime rongtalatna uamang ku∙mongangaha.
Rongtal an∙talaniko da∙onin a∙bachenge songjinmako jaboldam ba ja∙bol galchakram ong∙aoni naljokatna sakantikon bakrime Garo Hills ni nitoanina kam ka∙na uamang mol∙molaniko on∙anga. Ian AMS FILM ni nama dakmesoka aro re∙dilna miksongani ong∙a ine uamang dolni saksa parakangaha.
