Re·anggipa sal somoirango mikka jimbeani a·sel nosto ong·atako man·giparangna sokgipa State Disaster Responds Fund aro State Disaster Mitigation Fund a·dok sorkario baita tangka paisarang dongkuenganiko janape Dr. Mukul Sangma sing·doangaha. Niamgita ia tangkarangko a·jarangona watatna nanga aro ia fund-rang chong·motan State Disaster Responds Fund aro unbaksana District Disaster Mitigation Fund, District Disaster Management Authority (DDMA) ni Chairman Deputy Commissioner-rango dona nanga ine Sangma aganangaha.
Revenue & Disaster Management Department, Minister Kyrmen Shylla, tangka paisani bidingo chu·ongagita u·iani dongja ine aganchakaha. Unikoa, Dr. Mukul Sangma ia tangkarangko a·sel obostani somoirangosan jakkalna man·a aro ia fund-rangko daito gnangnigiparang jakona watatna nanga ine aganangaha. Relief on·a baksana taripiltaiani aro mikkangchina champengnagitaba ja·ku ga·na nanga ineba Sangma aganangkuaha.
Chief Minister Conrad Sangma-ba ia sing·anina aganchakaha jeon ua adita uni ma·sianiko talatangaha. Bilsi 5-ni gisepo 300 crore mang tangkarang sokaha aro re·anggipa bilsio a·sel ong·giparangna gong 71 crore-ko jakkalaniko Sangma parakangaha. District-ni gadangoba lakh 25-ko Deputy Commissioner-rangna pakwataha aro gipin nanganirangko nigrike on·dapaha ine Sangma agnanangaha.
DC-rangnaba niam gital tarianiko Sangma parakaha, jeon nangani kri nisiata man·gipa nokdangrangna sorkario sing·gija bosturangko on·e dakchakna man·gen. General relief-onikoba DC-rangna pakawatatgen aro lakh 25-ko DC-rangna ondapkuna miksonganikoba Sangma parakangaha. Re·anggipa chango a·selo ga·akgipa nokdangrangna nokking tinnarangko antisa ong·ahaon DC-ni gitaan sualangaha ine Sangma aganangkuaha.
Manderang a·sel ong·a bikan dakchakaniko nanga aro je somoio tangka chamatgiparang sokbaon ja 6 ba bilsisa ong·angpila ine Sangma neng·nikaniko ma·sichake janapaha. Unikoa, re·anggipa bilsi 5-o chandimatode State Disaster Responds Fund-ni ning·o gong 322 crore aro State Disaster Mitigation Fund-o gong 81 crore mang ong·a ine Sangma u·iataha.
