Da·al salo Khasi Students’ Union (KSU) dolrang sorkarini ra·gatna amgipa Meghalaya State Investment Promotion and Facilitation Act (MSIPF) 2024 aro Khasi-Jaintia Hills a·jarangona rel garirangko ra·bana miksonganiko jegale a·dokni assembly building-ona re·jomaniko dakangaha.
KSU dolrang tangsim nisan aro banner rango MSIPF aro railway ra·baaniko champengna uamangni namnikgijaniko mesokna adita jegalani kattarangko see assembly-ona re·jomange chrik a·bokangaha.
Meghalaya State Investment Promotion and Facilitation (MSIPF) Act ko ra·galpilchina KSU dol sorkariko dabianiko dakangaha. MSIPF-ni gita maming sakki gri a·arangko brena jotton ka·ani ong·anian Meghalaya Land Transfer Act-ni niamni kosako ja·ku de·ani ong·a ine KSU dolrang aganangaha.Railway-ko ra·bana skang Inner Line Permit (ILP) ko ra·gatchenge on·a nangchongmota ine uamangni banner rango see jegalanikoba nikangna man·aha.
KSU-ni General Secretary Donald V Thabah kobor ra·timgiparang baksa agangrikmitingo sorkari uamangni dabianiko knachakja dipetona indakgipa re·jomaniko dakange MSIPF aro Khasi-Jaintia Hills a·jarangona rel gariko ra·bana miksonganiko champenganggen ine aganangaha.
Sorkarina aro sak 6 MLA-rangna chitti-rangko see u·iatgenchimoba uamangoniko da·ona kingkingba maming aganchakaniko man·sokujan baksana sorkarina ia Act-ko ra·galchinaba ge·etaniko dakangaha maina ian Land transfer act-ni kosako kam ka·ani ong·enga ine KSU aganangaha. Iasan ong·aigija a·arangko gimaata baksana kam ka·e cha·ani cholrangkoba gimaataona sokgen maina ia niamni gita bang·gija manderangnasan namgniko ra·baaigen ine KSU-ni General Secretary Donald V Thabah agandapangaha.
Railway-ko ra·baanichi a·paloni manderangni jelaniko Meghalaya-ona bariataniba ong·gen ine aganangaha. Ia railway mingsa nangchongmotgipa ong·a ine chinga ma·sia, indiomangba a·paloni manderang re·bae songdonganichi ja·mano Meghalaya-o an·tangni jatrangan komibatgipa ong·skagen ine KSU General Secretary Donald V Thabah aganangaha.
