Mawphlang aro Mahendraganj-o rikenggipa Science & Commerce College-rangko matchotatna nangnikaniko janapange, chatro chatrirang ma·brangna nangjanagita academic session-ko a·bachengna nangengaha ine Chief Minister Conrad Sangma da·al salni budget session question hour-o sing·anina aganchakangaha. College noko skichakna biaprang dongahaode course-rangko a·bachengatna man·genok. Ia kamko contrator-rang ta·rake matchotate on·chinagita nirokate kam ka·anggen ineba Sangma ka·donganiko on·angaha.
Mawphlang-ni kamrangni bidingo Education Minister Rakkam Sangma jinmana parakengon, chu·gimik rika cho·anirango matchotaniko 86% mang ong·aha aro tangka paisa jakkalanio 94% mang ong·aha ine talatangaha. Ia kamko 2025 March jani gisepo matchotatna ra·doataiaha. Unikoa, pilak dakna nanganirangko tarisamsona sak 46 post-rangko bikotna nanganiko sorkari u·iataha aro unbaksana bijoli, chi aro re·chakatgipa ramako name tarina chamna nangkuenga ine Education Minister aganangaha.
Mahindraganj Bahsapara-o rikenggipa Science & Commerce College-ko rika cho·ani kamrang 66% mang aro tangka paisa jakkalanio 70% ong·aha. College-ko 2026 March jao matchotatna ra·doataienba somoiko donataha. Ia college-naba ggegipin college-gitaan apsandaken nanganirangko Sangma u·iatangaha.
Mawphlang-o rikkenggipana ma·mong sorkari 2017 June 30 tariko gong 36.55 crore-ko chamataha jekon bak 90:10 dake on·ataha aro gong crore 31.1685 tangkarangko pakwatataha. Uandake, Bahsapara project-na gong 36.31 crore-ko 30 June 2017 bilsio chamataha aro apsandakean 90:10 dake gamna nanga aro 23.5274 tangkarangko watataha ine Sangma u·iataha.
