France a·songo World War I-o dakgrikgipa matgrikrangko gisik ra·na Tura Babupara-o tarie dongipa a·damko nosto ka·anina bakrimgimin NGO dolrang, unikoa civil society organisation-rang, senior citizen-rang aro Mothers’ Union ku·cholsan ong·e raken jegalangaha. Ian A·chikrangni bebe ra·anio nangchakaha aro itihaso dongkamnagipako maming dakeba taripilna man·gijagipa ong·a ine uamang aganangaha. WW-I o A·chik matgrikrangni on·kangani, manderangni gisikoni kimitangjanagita ba gualjachina a·bachengo songe donggipagitaan taripiltaie on·china District Administration-ko bakrimgimin dolrang didiangaha.
Ia kamko namnikjae bakrimgimin NGO-rang aro Mothers’ Union dol name tale ra·na WGH Deputy Commissioner Jagdish Chelani-ko grongangaha. Indake ong·engon DC uamangna ka·donganiko on·aha aro ia a·damo ka·enggipa kamrangko ta·raken dontongatna ku·chakangaha. Iasan ong·aigija mikkangchi ia biapni gimin chanchirimna pilak manderang baksa tom·aniko daknaba ra·chakangaha.
DC-ko grongani ja·mano, Mother’s Union-ni Secretary Sume G. B. Sangma aganengon, DC-ni ka·donganiko on·enggipako rimchaksoa ine parakangaha. Ia a·damko songdonggipa manderang baksa chanchirima gri nosto ka·aniara jatna gisik sa·dikaniko on·aha ine Sangma parakangaha.
Bakrimgimin NGO dolrangba ia a·damo gipin bimangrangko taridapani aro commercial biap dakatna am·enggipa kamko raken jegalataha. Garo Labour Corps-ko July 16 tariko manina skang ia a·damko tarie matchotatchina aganangaha. Mikkangchiba songdongkamgipa manderangni kosako re·e uamangni maming u·iani donggipa indakgipa ja·kurangko ga·jachinaba NGO dolrang. Jatni gamchatgipa biaprangko nosto ka·ani pal ripingnasa nanga ine uamang aganangaha.
