Mijal salo Meghalaya cabinet Chief Minister Conrad Sangma-ni dilanichi tom·enba adita kamrangko dingtangataniko ra·chakangaha.
Skanggipao, a·dokni government office-rango kam ka·enggiparangna Special Casual Leave-ko dingtangatna ra·chakaha. A·bachengao ia leave-ko sal 15 on·aoni da·o sorkari sal 30-ona baridapataha. Iako sorkarini ning·o kam ka·giparang sports rango bak ra·engani gimin dingtangataha. Uamangni bak ra·e kal·engmiting aro songreani somoirangko ‘on duty’ ine segatnaba tik ka·angaha. Ian a·doko re·baenggipa 2027 bilsio National Games ong·na am·enggipana tarisamsonagita sorkarini office-rango kam ka·giparangna didianiko on·a ra·baaha ine Chief Minister Sangma jinmana parakataha.
Gnigipao, Meghalaya a·dokoni re·anggipa manderangna mongsongbate chatro chatrirang dongchakna man·agita Banglore songjinmao building nokko brena ra·chakaha. Ia noko me·a aro me·chikna dormitory donggen jeon sak 50 prakko dongchakatna man·gen.
Unikoa gittamgipao, Shillong songjinmani apchangketaniko olgrokatnagita Police Reserve-ko Tynring, New Shillong Township ona apjitatna tik ka·aha. Gital police reserve-ko rikna 50 acre a·arangko on·gen jean songjinmao adita re·rurana namgniko ra·bagen ine Sangma parakataha.
Brigipao, Retd. IAS, R V Suchiang-ko bilsi 3 na State Chief Information Commissioner (SIC) songna cabinet ra·chakaha. Iako sakgipin SIC ni retired ong·ani ja·man tik ka·aha.
Bon·kamao, MePDCL-ni Revamped Distribution Sector Scheme (RDSS) ni ning·o DBFOOT system-o smart meter prepaid-ko nirokna Advance Metering Infrastructure Service Provider (AMISP) ko kamo rimnapna cabinet ra·chakangaha.
