SWGH-o, Ia chang Chenga Benga Mela ong·nasiengani gimin name matchotatna man·agita ong·gija kamrangko ba joa kal·anirangko dakatjachina a·jani Superintendent of Police-na A·chik State Peoples’ Front (ASPF) Garobadha Unit dol u·iataha. Ia a·damo joa kal·chakatna permission on·aniko ASPF dol ma·sina man·aha. Iako uamang raken jegalate, niamni a·palo kamrangko ka·ataona sokatgen aro manianio tom·tomaniko sosojengjeng ong·atgen ine ASPF parakataha.
Re·anggipa bilsini Chenga Benga Mela-o sakgni bilsi chu·sokgija me·chik bi·sarangko Gandhipara songo jinma drae til·lekani obostarang sokbaahani gimin nirokaniko bilakatchinaba ASPF didiataha. National Commission for Protection of Child Rights (NCPCR), Rohingya rangni napbaani bidingo jajrenganiko janapataha, indake ong·engon manianio nirok simsakaniko raken mangrakatna nangenga ine ASPF dol parakataha.
Ia chang melao uamang joako kal·atjachina jekai baji ka·ani, lottery aro gipin dakgipa kal·anirangko raken beng·china didiataha. Maniani bako chu·ongagita police-rangko donchina aro CCTV camera rangkoba tekchina janapataha. Melaona re·bae bak ra·enggiparangko aro dokan dakna am·giparangkoba pale sim·e cha·na skang name lekka pancharangko am·dina nanga. Unikoa, me·chikma aro bi·sarangna dingtang mancha simsakaniko on·agita dakchakani desk, nangchongmotao naljokatgipa dol aro awareness campaign rangko on·jolchinaba ASPF dol mo·molataha.
