East Garo Hills, Williamnagar Rongrenggre o dingtang dingtang nangrimgimin NGO dolrang Nokma Association baksa bakrime winter capital-ko ni bidingo chanchirimna tom·aniko ong·atangaha.
Ia tom·anio dingtang dingtang dolrang jekai Achik State Peoples’ Front (ASPF), Garoland State Movement Committee (GSMC), Garo Students’ Union (GSU), Nokma Association, Mothers’ Union , All India Garo Union (AIGU), A·chik Progressive Approach (APA) aro Garo Hills Englightenment Society (GES) dolrang bakko ra·angaha.Ia tom·aniko ong·atani miksonganiara a·dok sorkarini Tura-ko Winter Capital dakna comittee-ko songna name dake chanchibewale nianiko dakani bidingo ong·atangaha.
Nokma Association-ni President Alden Marak, winter capital-na dabianiko apsan melie nangrime tom·toma gnang aro ka·saachi man·a amgen ine aganangaha.
Loyola College-ni lecturer Chibasal R Marak, ia tom·anio aganengon, Garo Hills-ni chadamberangni tang·dogijani uamangni miksongani ba on·kangani dongjani a·sel ong·ja indioba cholrang komiani aro nangganirangko man·jaengani a·selsa ong·enga ine parakangaha.
Advocate Bernita Marak pilak songdongenggipa manderangko ia re·mikanganiko dakna tarisamsoe dongchina didiangaha.
