Mikka jimme waanichi Ganol Hydro Power dam-o chirang agitchae donggenchimode dam-ko watna nangnaba gnang ine Tura, Rongkon MePGCL Ganol Civil Division-1 ni Executive Engineer chibimani samba jolo songdongenggipa manderangko simsake aro mikrake dongchinagita u·iataha.
Dam samba jolo mikka jimbee waode chirang ta·rakbee ditonaba donga jekon maming kenani dongjanagita dam-ko naljokatna aro dam-o tekgimin bijolini kolrangko name rakkina chirangko watna nanggen ine Executive Engineer parakataha.
Ganol chibima samba jolo donggipa manderangna re·anggipa sal somoirango MePGCL-nigita mikrakatani program-rangko ong·ataniko aro mic-rangko tekani bidingo u·iatmananiko ua janapataha. Uamang baksa department-o kam ka·giparangna watsapp group-koba kuliaha. Unikoa, chibima sambao donggipa songrangko chi watan somoio mikrakatsonagita siren-rangko km 16 prako tekaha aro Eden Bari unbaksana Chibragre dam power house joloba km 5 prako donaniko u·iataha.
Uni gimin Ganol chibima sambao songdonggiparangko ia mikrakataniko name gisiko donchina aro simsake dongchigitaba Executive Engineer mol·molangaha.
