Da·al salo West Garo Hills-ni Nokrek a·bri ja·reko donggipa Chandigre songo Honey Processing ba bija bitchi tarichakgipa centre-ko Meghalaya Legislative Assembly-ni Speaker Thomas A Sangma nokdonggae on·angaha.
Ia District Commerce aro Industries Centre (DCIC), Tura-ni ong·atgipa program-o MCCL-ni Vice-Chairman Dabo M. Marak, Rongram C&RD Block-ni BDO Cherime R. Sangma, dingtang dingtang department-rango kam ka·giparang, Bee-Keeping Cooperative Society-ni member-rang aro dam 16 songni manderangba dongpae bako ra·angaha.
Garo Hills-o da·o dipet co-operative society-o sak 357 bak ong·giparangko komibeoba sak hajalsaona apalbatate bija jilaniko bariatna bija jilgipa manderangko didiange mikkangchi ia centre chu·sokgipa ong·genchimode ge·gipin processing unit-rangko ra·bae dakchake on·agita Thomas A. Sangma aganangaha.
Ia Chandigre-ni Bee-Keeping Cooperative Society Limited-ni gitalgipa centre-ko Nokrek a·bri ja·reko songdong a·chaenggiparangna ru·utgijani ja·manon pakwate on·angna aro ia dam 16 songni manderangonin department-ni dakdilanio dilanganiko DCIC Tura-ni General Manager Don Felicient R. Marak aganangaha.
Ia gitalgipa Centre-na Apiculture Mission 2.0-ni ning·o tangka gong lakh 15-ko honey processing unit-na aro gong lakh 15-ko nokrangko riknagita chamataniko Apiculture Mission-ni Functional Manager aro Nodal Officer F A.Sangma aganangaha.
Ia centre-o bija bitchiko sepchotna, tarina, bottle-rango chipna, katomna aro seal ka·aniko dakna man·gen ine Sangma talatangaha. Da·o dipet ia centre-o bija donchakani ge 5 box-rang jean kg 7-oni 8-ona bilsiprako changgittam mangna bitchirangko ra·chakna man·gipako suale on·manikoba Sangma parakangjolaha.
