A∙dok sorkari adita salrangna skang National Power Corporation Limited (NTPC) baksa a∙doko bijoli wataniko namdapatna soi ka∙e songigrikaniko dakangaha. Chief Minister Conrad Sangma, bijoliko watanio nirokaniko NTPC jako ra∙e kamko ka∙angskagen ine aganangaha. NTPC bijoliko badinganio aro nirokanio changgipa sapgiparang ong∙a, ian mikkangchi a∙doko bijoli watanio nambate dakna dakchakbeani ong∙gen ine Sangma agandapangaha.
Sangma ni aganani gita NTPC hajal 75 MW bijoliko bikotna amgipa ong∙a aro hajal 1 million unit mangni bijoliko salprako bikotna man∙a. Unbaksana NTPC bijoli bikotna solar ba salniko bijoli bikotna, thermal, hydro aro minggipin cholrangko jakkalgipa ong∙a. Uamango dal∙dalbegipa solar power plant rang donga jerangkon uamangni bang∙a company-rang jako ra∙e kam ka∙enga ine Sangma parakangaha.
NTPC baksa bakrimanichi a∙doko bijoli bikotaniko dingtang dake kam ka∙na man∙gen ine Sangma janapangaha. Salni somoio Gujarat aro Rajasthan o solar-oniko bijoli bikotaniko dake Meghalaya a∙dok ia bijolirangko gong 2 ba gong 3 ka∙e brena man∙skagen. Ia somoio hydro plant ba chioniko bijoli bikotaniko dontongate, walni bako solar power dongjamitingo jakkalskana man∙gen ine Sangma parakangaha. Ian apsan bijoliko brinbawe ka∙e jakkaldimani ong∙gen ineba ua agandapangaha.
Sorkari NTPC baksa Pump-Based System ko name ma∙sie ra∙chinaba u∙iatangaha jeon Umiam o jokonanggipa chirangko dam-ona saldobaple jakkaltaina chanchianggen ine Sangma parakangaha. Sorkari an∙tangba ia project-ni bidingo kam ka∙na miksonganiko Sangma u∙iatangaha. Ia kamrangko chu∙sokatna man∙genchim ong∙ode NTPC aro MeECL na adita kajinarangko man∙a dakchakani ong∙gen ine ua agangangaha.
