All Meghalaya 4th Teachers’ Association, Garo Hills Unit-ni gita a∙dok sorkarina uamangni kam ko regularise ba pangkamgipa ong∙atchina aro Adhoc UP School-o skigiparangni man∙gipa dormaha baksa apsan ong∙atna nangnikaniko dabiangaha. Unbaksana bilsi prako 5% ni gita increment ko on∙na nanga ineba uamang chittio see u∙iatangaha.
Re∙anggipa bilsirango uamangni sak 1521 skigiparangni kamko pangkamgipa ong∙atnagita Chief Minister Conrad Sangma aro Education Minister Rakkam A Sangma-na memorandum ko on∙anggipao pangchake uamangna gisik ra∙ataniko dakangaha.
4th teacher rangni gong 12,000 dormaharangko man∙miting somoio Assistant teacher rangni dormaharangko 2017 bilsioni gong 20,493 ona bariataha. Uamangni neng∙nikanirangko sorkarina baditaba chang janapani ja∙manosa dormaharangko gong 18,000 ona bariataha ine uamang janapangaha.
Constitution-ni Article 14 jean Right to Equality o pangchakani gitade uamangni man∙a nanggniko jechakagita ong∙a ine uamang agandapangaha. Uamangni da∙o man∙enggipa gong 18,000 dormahachi nokdangko nirokna neng∙nikaniko janape, a∙dok sorkariko Cabinet baksa tom∙e uamangni nangnikaniko chanchirimchina mol∙molangaha.
