Backlog ba ru∙utbea salrangna man∙a nanggnigipa kamrangna manderangko ka∙sinsin ra∙napaniko dakchina, kamo dongenggiparangko ra∙galaniko chanchitaina, nambatgipa ja∙kurangko de∙e cholrangko on∙china ACHIK, sorkarina didianiko on∙anga. Ia man∙a nanggipa kamrango rimnapaniara manderangna dangdike on∙anio gamchatgipa ong∙enga ine ACHIK ni President Thomas M. Marak aganangaha. Adita salrangna skang Chief Minister Conrad Sangma, kamrang on∙aniko changsano rimnapaniko (one time recruitment drive) dakgen ine ku∙watangaha. Gitcham MPS, MCS aro ACHIK Council of Elders ni dilgipa Laben Ch. Marak, kamrango ra∙napaniko jringna dakna nanga jeon sakanti kamna galenggiparang cholko man∙an baksa kakketo kamna seokna man∙gen ine aganangaha.
Roster system ni Office Memorandum (OM)-ni gimin Bristibar salo Chief Minister-ni agangipa kattana ACHIK ni General Secretary Bernita R. Marak, Roster System ko ru∙utbea salrangoni ong∙baenganiko nipiltaie name kam ka∙na nanga ine dabiaenggipani bidingo OM o janapa dongja ine aganangskaaha. Da∙o ja∙kuko de∙enggipani bidingo manderangna jajrenganiko ra∙baenga, kam ka∙giparangna aro uamangni nokdangrangna neng∙nikaniko on∙enga ine Thomas Marak janapangaha. Chief Minister-ni kamrangko ka∙anio aro ja∙kurangko de∙anio manderango ka∙dongani donga ine ACHIK dolrang backlog rangko kraa bewalo sakantini namgnina kam ka∙e on∙a nanga ine didianiko on∙angaha. Chief Minister Conrad Sangma sakantini agananirangko knachake aro a∙dokni manderangni nangnikani ba dabianirangko gisiko done re∙mikkangchina ua mol∙molangaha. ACHIK dolrang iani bidingo mikkang niteagri aro ma∙siani gnange kam ka∙anggen ine Chief Minister-ni aganchakanio knana ka∙dongsoaniko parakangaha.
Tura ko Winter Capital Songna Dabiani
ACHIK dolrang Tura-ko Winter Capital songe on∙china Chief Minister Conrad Sangma-o dabianikoba dakangenga. Uamang, Garo Hills-ona nangchongmotgipa officerang, a∙dokko nirokaniko namdapatna, tang∙doatna aro kamrangko apsandake suale ra∙bana dabianiko miksonge dakenga. Garo Hills o Tura dal∙batgipa songjinma ong∙e a∙dokni bang∙a nangchongmotgipa kamrangko jako ra∙e ka∙na bil amgipa ong∙a ine Thomas Marak parakangaha. Tura songjinma pilak songadam nokadamrangna cholgugaba ong∙a, re∙a doanio altugipa aro manderangko nirokanio nambegipa ong∙gen ine ua agandapangaha.
Iarangchi Garo Hills ni manderangni janggi tanganiko tang∙doatna gita dakchakani ong∙gen aro dingtang dingtang kamrangko ra∙bae a∙jani silroro namroroanina kam ka∙na man∙gen ine Marak janapangaha. Unbaksana A∙chikrangni daka-rika bewalrangko mesokatna aro ripingna dakchakaniba ong∙gen ine ua agandapangaha.
Tura-ko Winter Capital songanichi Shillongo kam ka∙anirangko ritchengatasan ong∙aigija, sin∙kari somoirango songjinmao songre songgabatgiparang bang∙engmitingo kamrangko ka∙na Tura ona ra∙baanichi manderangni jelbraaniko komiatna man∙gen. Winter capital ong∙na amgenchimode a∙doko sason ka∙anirangko name nirokna man∙an baksa a∙jani dilgiparang bang∙a kamrango bak ra∙na, ja∙ku de∙ani cholrangko ra∙bana aro a∙dokni namgnina on∙gilpana man∙gen ine Marak aganangaha.
Tura ko Winter Capital songna a∙jani pilak manderang baksa chanchirime dabianiko dakna miksongaha. Turani dingtanggipa biap ong∙aniko nike, Garo hills ni manderangna skia poraianiko on∙enggipa aro bading chiwalanio tang∙doaniko nike Tura ko Winter Capital songchina dabina jinma ra∙chakaha ine Marak aganangaha. Iachi a∙dokni pilak biaprango kamrangko apsan sualanio aro dingtanganiko ra∙bana dakchakani ong∙gen ine Laben Marak aganangaha.
Turako Winter Capital songna dabienganiko re∙baenggipa August jani Assembly session o mikkangchi a∙dokni dingtanganina aro nitoanina chanchirimna nanga ine ACHIK ni President Bernita R. Marak aganangaha.
