A∙chik Conscious Holistically Integrated Krima (ACHIK) ni dolrang Tura-ko Winter Capital songna dabianio bak ra∙pachina soi ka∙e ku∙mongrimaniko a∙bachengataha. Iako dake sakantini chakpaaniko man∙a aro songsalo chagrongengipa neng∙nikanirangko naljokatani ja∙kurangko de∙na ong∙atenga ine ACHIK dolni President Thomas Marak parakataha. Manderang baksa ku∙cholsan ong∙e saksa sakgipini janggi tanganiko u∙igrikosa mikkangchina re∙mikkangna nambata ja∙kurangko de∙na amgen ine ua agandapangaha.
Manderangni re∙bae soi ka∙e chakpaaniara uamangni jatna aro a∙jana ku∙monge dingtanganiko ra∙bana ku∙rang on∙ani ong∙a ine Marak aganangaha. Ia campaign ko ka∙e dingtang dingtang Garo hills ni biaprangona bakrimaniko sokatna miksongani ong∙a. Jinma ku∙monganiara a∙doko skia porani, sanna bannani, daka-rika bewalrangko ripingna aro songsalni dingtanganina ku∙rangko on∙gilpaani ong∙a ine Marak aganangaha.
Sakantian ia dingtanganiko mikkangchi re∙bana bak dongpana nanga aro ia campaign-an ku∙mongpaaniko on∙a namgipa chol ong∙enga ine Marak mol∙molaniko on∙angaha.
