ACHIK dolni Tura-o winter capitalko on∙china dabianiara inditana nangchongmota ong∙ja maina Garo Hills Shillong oni bang∙e chel∙bea ong∙ja aro Tura oni Shillong ona re∙na dona manderangna neng∙nikanirangba dongja ine KHNAM ni Working President Thomas Passah Sombar salo aganangaha.
A∙jako tang∙doatna aro namroro silroroatna miksonge dabianiko dakgenchimode, a∙doko bang∙a capital rangko songe on∙a nanggen maina West khasi Hills, Jaintia Hills ba Ri-Bhoi a∙jarangan ja∙manchakbatgipa ong∙enga ine Passah parakangaha. Batanggimin bilsirango rika cho∙anirango tang∙doatna tangka paisarangko chamataniko nigenchim ong∙ode Garo Hills bang∙bate man∙enga ine ua aganaha. Garo Hills a∙jana chamatgipa tangka paisarangko niatgenchim ong∙ode Tura-an winter capital man∙a krabatgijagipa ong∙gen ine ua agandapangaha.
India a∙song gimiko Himachal Pradesh mangmangsan capital damgni donga jean Shimla aro Dharamshala ong∙a. Ua a∙dok sin∙gipa biap ong∙e surirangni a∙sel ramarang champenganiko man∙e Shimla oni Dharamshala ona re∙na dona neng∙nikani giminsa capital ge∙gniko on∙aha. Meghalaya a∙doko indakgipa neng∙nikanirang dongjani gimin capital damgni nangani katta an dongsrangja ineba ua aganaha.
January 21, 1972 bilsio Meghalaya a∙dok ong∙bachengaoni Shillongsa a∙dokni capital ong∙ani gimin Shillong kosan capital mangmang ine name rakkina nanga ineba Passah aganangaha. Ia dakgipa dabianirangko niatna nangja maina a∙doko nanga gri korosko bariatani aro a∙dokna bojasan ong∙aigen ine ua agandapangaha.
