Ampati Civil Hospitalo, 50 BN BSF dolrang Blood Donors Day ko maniani bako Blood donation Camp ko mejal Sombar salo ong∙atangaha. Ia camp-o bang∙bea manderang BSF doloni aro sanna bannaniko dakenggipa manderang gisiko nangbee bakko ra∙angaha aro dakchakaniko on∙angaha.
Ia Blood donation camp-o sak 25 manderang 50 BN BSF doloni an∙chirangko on∙e manderangni janggiko jokatna kam ka∙anio dakchakanganiko nikna man∙angaha. Unbaksana sanna-bannaniko dakenggipa doloni Dr. Denisha G Momin Medical Superintendent, Dr. Lydia M Marak, Senior Medical and Health Official Ampati, Senior Medical aro Health Officer IC Blood Bank Tura, Dr. Tami G Momin, Dr. Ambat D Momin Senior Medical and Health Official Civil Hospital Ampati, Dr. Mikrak D Sangma Medical and Health Officer Ampati aro Dr. Tosino CH Marak Medical and Health Officer Civil Hospital, gisik nangbee bakko ra∙angaha.
Yuvraj Dube, 50 BN BSF ni Commandant, Randheer Singh Gill, Second in Command, Dr. Heena Khan,50 BN BSF ni AC/MO aro Inspector Avtar Singh ba ia campo dongpae bakko ra∙angaha.
Ampati Civil Hospital ni Medical Superintendent, BSF dolrangni chakchikgija manderangni janggiko jokatna an∙chirangko on∙e dakchakna re∙baanina mittelpilani kattarangko aganangaha. Indakgipa camp rangko ong∙atanichi mande jatskana ka∙sae janggiko jokatna kam ka∙anian katchabeani ong∙a ine parakangaha.
