Khasi ong∙ani chinga an∙chion donga, chingko tol∙e segate draesa India a∙songni mande ong∙ataha ine sombar salo Hynniewtrep National Youth Front (HNYF) dolni President Sadon Blah aganangaha. Khasi jatrang India Union baksa bakrima dongkuja aro maming saloba bakrimani lekkarangko bi∙pilgenchim ong∙ode mesokna man∙jawa ine ua aganangaha. Chinga mamingsaloba an∙tangtangko India ni mande ine ra∙chaka dongja, ian maiba a∙sel ong∙esa India-ni mande ong∙ate segatako man∙aha ine ua aganangaha.
Constitution-ni chu∙onggijaniko ma∙mong sorkari nipiltaina nanga ine Blah aganangaha. Dingtangmancha dakarika bewal donggipa manderangni bebe ra∙aniko naljokatna a∙songni tarigimin niamo maming pangchakatani dongja. Ma∙mong sorkari iani gimin Inner Line Permit (ILP) na dabianiko mande ra∙na nanga ine ua aganangaha. A∙dok sorkariba MRSSA ko ra∙gate on∙manaha, iako uamang da∙o dingtanganiko dakna nanggen ine pasikaniko on∙enga ine ua agandapangaha.
