Khasi-Jaintia Hills a∙jao railway ko ra∙bana miksonganiko jegalenggipa dolrangko, North Garo Hills Mendipathar o badita name chu∙sokgipa ong∙e manderangna dakchakaniko on∙enga nie ma∙sie ra∙na nanga ine Cabinet Minister Ampareen Lyngdoh didiataha.
Re∙anggipa antio East Jaintia Hills a∙jao railway ko ra∙bana biaprangko nianiko dakenganiko changsatai Chief Minister koborrango u∙iataiaha. Railway ko ra∙bana miksonganiko champenggipa dolrang rang∙san jegalaniko dakangtaiaha maina iako ra∙bana skang Inner Line Permit (ILP) ko ra∙gate on∙chengna nanga ine parakataha.
Jerangan railway ra∙baaniko jegale aganengachim, Mendipathar ona re∙ange jolo songdonggiparangna neng∙nikani aro gipin biaponi ba a∙dokrangoni re∙bae donggiparang dongama dongja am∙sandianiko dakchengna nanga ine Lyngdoh aganangaha. Garo Hills ko niatgenchimode a∙jao bikotgipa bosturangko komia damo aro nengrabate gipin biapona ra∙angna gita man∙engaha ineba Lyngdoh agandapangaha.
Meghalaya a∙dok chugipa a∙a aro a∙briraragipa biap ong∙genoba railway ko ra∙bana chu∙sokgipa ong∙genma ong∙jawa nichengna gita nanga. Je kamko ka∙na gitaba nama aro namgijani rangko pangnan chagronga. Jensalo sorkari maiba namgniko chanchie ra∙bana miksongon, manderang jegalna a∙bachenga. Ia obostarangni a∙selsa sorkari maiba namgniko ra∙bana miksonganikoba bon∙ataona sokatronga maina sorkari manderangna dangdike on∙gipa ong∙a ine Lyngdoh aganangaha.
