A∙chikrangni pagitchamrangni golporang aro jatni dakarika bewalrangni bidingo segipa “Biporinni Katta” poedoko A∙chik Literature Society (ALS) July jani 22 tariko oprake on∙angaha. Ia poedoko Chenggan A. Sangma am∙chimonge seaha jekon Dr. Milton S. Sangma kitapko nambate chapa ka∙nagita dakchakaha. ALS rang A∙chik jatni dakarika bewalrangko ripingna jotton ka∙anio changsatai ia kitapko oprake on∙anichi jatni gimaangenggipa dakbewalrangko chanchitaina dakchakbeani ong∙gen.
Ia tom∙ani bako uamang Garo Hills o skia poraiani namrorogijaenganiko golporime chanchianiko dakangaha. Uamang mongsongbate primary gadango neng∙nikanirangko am∙sandie uarangko namdapatna ja∙kurangko de∙nagita mangsongangaha. A∙dokni skia-poraianiko a∙song gimik baksa tosusae mikkangchina jajrengsoanikoba uamang chanchirimaniko dakangaha. Iachi uamang Garo Hills o skia poraiani aro bida pakwatani bidingo adita cholrangko sandie mikkangchini namgninaba re∙mikkangna chanchirimangaha.
