A∙dokni primary gadango skigipa dol, Meghalaya Upper Primary School Teachers Association (MUPSTA) Education Minister Rakkam A. Sangma ko gronge adita u∙iatanirangko dakangaha. Gitchambatgipa skigiparango kraagita upadi lekkarang dongjae aro bilsirang re∙angani a∙selo neng∙nikanirangko man∙enga ine MUPSTA dol u∙iatangaha. Uamangna bate chu∙sokani gadang dal∙batgiparangko aro dambebatgiparangko rimnapna gita uamangko kamoni neng∙takdraate komibegipa lakh 5 ko on∙china Education Minister o mol∙molangaha.
Minggipin uamangni mol∙molanio gong lakh 10 ko ad hoc skigiparangna kamoni neng∙takani somoio on∙china parakangaha. Ia skigiparang ru∙utbea bilsirangna skulrango skigenchimoba pension ko man∙a kragiparang ong∙paja ine MUPSTA dolrang janapangaha. Changsatai uamang 844 upper primary ad hoc skulrangko deficit ona ra∙gatchinaba mol∙moltaianiko dakangaha. 2020 bilsion deficit dakatna dabianiko ra∙chakmangenchimoba da∙o bilsi gittam ong∙piloba niata dongkujaenga ine MUPSTA dol Sangma ko gisik ra∙atangtaiaha.
