Adita ru∙utgija somoio NITI Aayog uni gitalgipa National Multidimensional Poverty Index (MPI) ba kangal cha∙asianiko mesokatgipani gnigipa edition-ko parakataha. Uamangni tosusaae nigrikanirangko, an∙seng baljoke dongani, skia poraiani aro janggitangani gadango pangchake on∙angaha. A∙doko gimiknigitan kangal cholgriani 2021 bilsio 32.54 % ong∙aoni da∙o 27.79% ona tang∙onangaha. Lakh sa hajal sotbonga kangal cholgri manderangni tangdo∙anikoba nikna man∙aha ine Planning Department-ni Commissioner & Secretary, Investment Promotion and Sustainable Development parakataha.
MPI ko ming 12 a∙barango pangchake tosusaaniko dakaha jekai cha∙a ringani, odek bi∙sa aro dal∙drobaenggiparangni janggi tangbangani, an∙o gnanggipa ma∙giparangni an∙seng baljokani, skul re∙ani bilsirang, skul re∙anio gisik nangani, song∙e chane cha∙ani to, rongtal an∙talani, ringani chi, bijoli jakkalani, nok jamrang, gam jin aro bank account-rango pangchake toaniko dakangaha. Iarangoni Meghalaya a∙dok ming 8 a∙barango tangdo∙anirangko nikna gita man∙aha.
A∙dok sorkari namgipa dingtanganiko ra∙bana adita programme-rangna tangka paisarangko jakkalaha jekai MOTHER, MHSSP, ECD, FOCUS aro ma∙mong sorkarini chamatgimin scheme-rang jekai Jal Jevan Mission (JJM), MGNREGA, PMAY aro PMUY rang ong∙a. Meghalaya-na ma∙mongni chamatgipa scheme-rangko jakkalanio nambatgipa a∙dok ine agananirang gnang jekai JJM ko ra∙bae name kam ka∙giparangoni gnigipa chu∙sokgipa a∙dok ine bimingko man∙aha. Je report-rangko re∙anggimin somoio on∙angaha uarangara batanggimin baditaba bilsini report-sa ong∙a ine u∙iataha. NHFS-5 ni report on∙aniara 2019 bilsio se∙gate rakkigiminsa ong∙a aro re∙anggimin bilsi 3 o je dingtanganirang ong∙baahachim ba je a∙barangon tangdo∙ahachim iarangni gimin mamingkon mesokjaha ine parakataha.
