West Garo Hills pulis ni niksamsoe obostarangko champengna aro Chief Minister ni naljokanina tarisamsona man∙janina Congress ni MLA Saleng Sangma sing∙doaniko dakangaha. Tura-o ong∙anggipa obostarangko jegalan baksa Health Minister Ampareen Lyngdoh ni batanggimin somoio Jengjal oni Shillong ona re∙pilangna nangani bidingoba simsaksogijaniko mesoka ine ua aganangaha.
Ua somoio Chief Minister maiba a∙sel ong∙anichi saknaako man∙genchimode aro slai rangchi gogrikaniona sokgenchimode namen namgijagipa ken∙begni mamlaona sokanggenchim ine ua aganaha. Ia ong∙anggipa obostarangni a∙sel ni bidingo pulis rangko name sing∙sandie kamrangko ka∙chinaba aganangaha. Unbaksana Winter Capital ni dabianio rakbee kam ka∙dilgiparangni dakdilanikoba bon∙chongdikataba ong∙a ine Sangma agandapangaha.
Ia obostarangko ma∙sisamsoani donggenchimode pulisrang CM ni naljokanina a∙bachengonin kamrangko ka∙nagita nangachim. Ia mamlani bidingo WGH pulis rangni simsakgijani a∙selsa ong∙aha ineba Sangma matnanga gnang aganangaha.
