State Bank of India (SBI), Asian Development Bank (ADB) Garobadha branch, Tura-ni SBI, Regional Business Office (RBO) ni gita Customer Outreach aro Connection Program-ni chu∙sokanina 2023 bilsini Mega Sandhya Shivir bakni gita program-ko Garobadha Nirupama Memorial Secondary School (NMSS) o ong·atangaha.
Ia tom·anio Rerapara C&RD Block-ni BDO Armand Ch. Momin mongsonggipa sokgipa ong·e ia programni gamchataniko u·iatangaha aro Self Help Group (SHG)-o napgipa manderangkoba Aadhar-ko link ka·e jakkalchina didianiko on·angaha. SHG group-rangni neng∙nikanirangko chagrongoba dilgiparang baksa agan-golpogrikaniko dakchina, loan-rangko somoi gita chotpilchina aro dontonggija miksongaona kamko ka·angchinaba didiangaha.
Unbaksana NMSS skulni Headmistress Marstella Ch. Sangma-ba mongsonggipa sokgipa ong·pae SBI-ko songadamrangona sokatna man·anina katchaaniko mesokangaha aro apsan bakrimao bilakbatatna ka∙dongatanirangkoba aganangaha. Poraiani gadango aro economy-ko bilakbatatna, songsalo janggi tanganio dingtanganiko ra∙banagita man·gen ine Sangma aganangaha.
Tura-ni SBI, RBO Manager Abhijit Dutta President-ni kamko ra·e tom·aniko dilange SBI-ni SHG dolrangko ra∙dona aro songadamrango dangdike on∙anirangko namdapatana dakchakna ku∙mikchetani giminba talate on∙angaha.
Ia program-ni miksonganiara SBI ni bang∙a niksamsoanirangko aro songadamrango nambate kamrangko chu∙sokatnagita bakrime kam ka∙na ja∙ku de∙ani ong∙a ine parakangaha.
