South Garo Hills, Baghmara ni dolgittam NGO-rang jekai NGCO, ADE aro AYWO a∙jani dingtang dingtang nanganirangna aro namroro silroroanina a∙dokni dingtang dingtang Minister-rangko gronge memorandum-ko on∙angaha.
South Garo Hills a∙jao bang∙bata skul nokrang namjahanina aro galchipako man∙e dongenggipa skul nokrangko ta∙rake nirokatchina gita a∙dokni Education Minister Rakkam A Sangma-ko gronge mol∙molangaha. PHE Minister Marcuise N Marak ko gronge uamang a∙jao Jal Jevan Mission (JJM) ni gita kam ka∙anirangko nirokatchina gita mol∙molangaha.
Apsan dake Power Minister A T Mondal-koba uamang gronge a∙jani manderangni bijolina neng∙nikanirangko janapangan baksa wachi kario tower linerang dongjani a∙sel bijoliko den∙a nangani gimin tower line-rangko ta∙rake songe on∙china didiangaha. Baghmara-ni MLA Kartush Marak koba gronge uamang a∙jaona Taxation Department-ko ra∙bae on∙china aro Civil Hospital ona dakanggipa ramako name tarie on∙china didiangan baksana Hospitalo chu∙onga gita sanna-bannani bosturangko ra∙bae on∙chinaba mol∙molangaha.
