Chang 20 gipa changna Meghalaya Legislative Assembly-ni sokachake ong∙atanggipa Commonwealth Parliamentary Association India Region Zone III ni Annual Conference Robibar salo name matchotangaha. Ia conference ko ong∙ate chanchirimanichi gitalgipa cholrangko u∙ie niamko tarianio aro Northeast a∙jarangna chu∙gimik tang∙doanina dakchakbeani ong∙gen ine a∙dokni Governor Phagu Chauhan ka∙dongsoaniko parakangaha.
Northeast a∙jani biaprango natural disaster ba ong∙telaigipa a∙selrang jekai chi bana, a∙a be∙grua aro banggurianirang ong∙rongani gimin uarangko nambate jako ra∙e kam ka∙na chanchirimaniko dakangaha. Unbaksana a∙songni dal∙dalgipa songjinmarang baksa re∙a doanio neng∙nikanirangko altuatna rama jal∙angrang, railway, airport aro mobile network rangko namdapatna golporime cholrangko sandiangaha. Iarangan tom∙anio mongsonggipa chanchirimanirang ong∙a.
Ia tom∙anio Lok Sabha-ni Speaker OM Birla baksa Northeast a∙jani pilak Assembly Speaker-rang aro dingtang dingtang gadangni manderang bakko ra∙angaha.
