Dalu, West Garo Hills district o bilsi 60 ong∙gipa Ohindro Dalu minggipa mande saksako ka∙namgijagipa buringni mongma rang kal∙ake siataha. Ia ong∙a obosta Khilapara, Indo-Bangla sima ari biapo buringni mongmarangni salni bako batsotengmiting somoio ong∙aha.
Batsotenggipa mongmarangoni manggitamde dal∙giminrang ong∙achim aro manggnide bi∙sa ja∙rikpagiparang dongpaachim. Manderangni kal∙akaniko man∙e mongmarang bi∙satangna namen simsakna aro chel∙chakna jotton ka∙engmitingo Ohindro Dalu ni uamangko champenganiko nike uko ga∙rineke janggiko gimaata.
Ian Garo hills o gnigipa changna mongmarangni antisani gisepo kal∙ake siata obosta ong∙a. Batanggimin salo Alokpang songo bilsi 21 ong∙gipa chadambe saksaba apsan daken sombar salo june ni 5 tariko mongmani kal∙akako man∙e janggiko gimaatahachim
Wildlife department rangni mongmarangko kal∙akaniko champengna jotton ka∙beoba manderangni manigijani a∙selo bilsi antian bang∙a manderang janggitangko gimaatna nangao ga∙akronga.
