National Education Policy (NEP) 2020 ko ra∙gatna nambata cholrangko sandinagita a∙dokni chubatgipa Education Council August jani 10 ba 11 tariko, NEHU ni Vice Chancellor aro gipin kam ka∙giparang baksa tom∙e chanchirimanggen ine Education Minister Rakkam Sangma u∙iataha. Sangma ia kattarangko Hynniewtrep Youth Council (HYC) aro NEHU Students Union baksa golporimani ja∙mano parakatskaaha. NEP ko a∙songo gipin a∙dokni University-rang ra∙gataha jekon da∙o Meghalaya a∙doko ra∙gatjaode Under Graduate ni chatro chatri rang gipin University rango napna bilsisako sengna nangkugen ine Sangma parakangaha.
HYC ni President Robertjune Kharjahrin ni aganani gitade a∙dokni mitam bidani biaprang NEP ko ra∙gatna ra∙chakanina aro mitamrang jechakani a∙selo jajaanirang ong∙katenga ine parakataha. NEP ko ra∙gatna Academic Council ni ra∙chakaniko nanga aro NEHU ni Executive Council mangmang NEP ko ra∙gatna ra∙chakmangmangachide ong∙na man∙jawa ine ua aganaha. NEHU ni Academic Council baksa tom∙bimonge iani bidingo chanchirimna nanga aro jegalaniko dakenggipa skigiparang baksaba golporimna nanganiko HYC dol janapangaha.
NEP ko ra∙gatani bidingo skigiparang champenga ong∙ja indiba iako ra∙gatgenchimode neng∙nikanirangko chagrongnaba gnang ine uamangni jajrenganisan ong∙a ine Sangma aganangskaaha.
