Justice Biswadeep Bhattacharjee-ko Meghalaya High Court-ni Additional Judge-na seokako man∙e administration-ni gita office-o ku∙mikchetaniko dake a∙dokni Chief Justice Sanjib Banerjee re∙anggipa Mongolbar salo songe on∙angaha.
Justice Bhattacharjee, 1968 bilsini March jani 29 tariko Shillong songjinmao atchiaha aro ua LLB degree-ko North Eastern Hill University (NEHU) o poraie matchotaha. 1993 bilsio an∙tangni poraigiminko bidako jakkalna gita Advocate-ni kamko ka∙na a∙bachenge 2018 bilsini September jani 6 tariko Additional Advocate General-ni kamko ka.angskaaha.
Ua Meghalaya High Court-ni Senior Advocate ni kamkoba 2021 bilsini September jani 24 tariko ka∙baaha ine u∙iatangaha. Indake da∙o ua Meghalaya High Court-ni Additional Judge ni kamko jako ra∙e kam ka∙angskagen.
