Budbar salo Meghalaya Public Service Commission (MPSC) ni service rule ba kamrangni niamko a∙dokni Cabinet tom∙aniko dake ra∙gatangaha. Indita bilsirangna MPSC ko chalaigenchimoba kam ka∙giparangna maming service rule ko ra∙gata dongjani gimin, da∙alo Cabinet ni tom∙anio ra∙chake MPSC na service rule ko ra∙gatnagita tik ka∙aha ine Chief Minister Conrad K Sangma u∙iataha.
Unbaksana 1987 bilsini Meghalaya Medical Council Act koba namdapatna rai ko on∙angaha. “Re∙anggipa bilsirango Meghalaya Medical Council Act ni ning∙ao Medical Council of India, MCI ni bidingo janapa kattarang gnangchim. Ia MCI kattako National Medical Commission-ona dingtangatani gimin, ua kattao pangchake niam ko dingtangatna aro namdapatnaba da∙alo Cabinet ra∙chakangaha” ine Sangma agandapangaha.
