Chang 38 gipa Meghalaya State Badminton Championship kal∙susaanio Garo Hills ni adita Badminton kal∙giparangni bak ra∙anganiko nikanggen. Ia kal∙susaaniko August 2 tariko WKH a∙jani DC Gorod LSN Dykes ni jakchi oprake on∙angaha jeon Meghalaya State Badminton Championship Association aro West Khasi Hills District Badminton Association (WKHDBA) ni dongpaanio a∙bachengataha.
Ia chang 38 gipa a∙dokni Badminton kal∙susaani salbrina ong∙anggen chongmotan August 5 tariko bon∙kamgipa sal ong∙e kal∙aniko matchotatgen. Iano chu∙gimik sak 256 chadamberang bakko ra∙anggen jeon a∙dokni dam sku a∙jarangoni re∙bae susaanganiko dakanggen. Ia kal∙susaaniko bilsi 13, 15, 17, 19 ni ning∙ao ong∙gipa chadamberangna ong∙atangenga unbaksana dal∙gimin me∙a aro me∙chikrangni dolrangnaba kal∙susaanirang gnang jekon apsan somoio ong∙atanggen.
