July 24 tariko CMO Tura o so∙sojengjeng ong∙ani bidingo Magistrate gadangni am∙sandianiko sorkari sengenga ine Conrad Sangma parakataha. Ia ong∙a obostani bidingo Magistrate-ni gadango am∙sandiani ru∙utgija somoion matchotgen aro nanga ong∙ode jakgitele sandianikoba dakatgen ine Sangma parakataha. Ia mamlao da∙o dipet sak 47 jak donggipa manderangko rim∙aha jekon pulis dolrang CM ko chadrape so∙otna miksonge dakaha ine parakatskaaha.
Pilak dosi gnanggiparangni kosako sal a∙bachengaonin sakkirang baksasa ja∙kurangko de∙enga jekon sakkio pangchakesa matchotatgen ine Sangma agandapangaha. Ia ong∙a obosta ong∙na kragija ong∙aha aro iani bidingo pulis dolrang kona noksikko nigrike niam bidikko rakkia gnang kam ka∙anggen ine Sangma parakangaha. Pulis dolrang jedakgipa ja∙kurangko de∙genchimoba uamangni kosako matnanganirang dongtelaigen. Uamangko jakgitele kam ka∙na on∙anian nambatgipa ong∙a jedakode a∙doko dongimin niamko jarikaniko name rakkina man∙gen ine ua agandapangaha.
