A∙dokona gipin biaprangoniko ra∙bae na∙tok aro na∙tik-rangko badingchiwalaniko da∙aloni sal 15-na kingking Food Safety Authorities-ni gita dontongataniko dakangaha.
Da∙alo u∙iatani gitade mang 40 na∙tokrangko porikka ra∙e nianio, mang 30 na∙tokrangoniko formalin (jean bisi gnanggipa be∙en-na namgijagipa bostu) ko man∙aha ine Commissioner of Food Safety-ni Rosetta M. Kurbah aganaha. Ia porikka ra∙aniko a∙dok sorkarini Assistant Food Analyst rang dakangaha.
Food Safety and Standards (Food Products Standards and Food Additives) 3.1.4, 2011-ni niamni gitade, je on∙dapani rangko cha∙ani rango on∙a man∙achim uko segatgimin-o formalin de niam gnang on∙gipao dongjachim.
Food Safety and Standard Act, 2006 ni niam-o aganani gitade na∙tok-rangko donchake, suale aro badingengon formalin-ko jakkalna beng∙ani gnang, maina uko jakkalgenchim ong∙ode na∙tok-rangko cha∙na be∙en-na namgijagipa ong∙a ineba agandapangaha.
Uni gimin, Food Safety and Standard Act,2006-ni Clause (a) Sub-Section (2) Section (30)-ni ning∙ao bilko ranta ka∙ani gita, gital ba chipe dongimin na∙tokrangko donchakaniko aro badinganiko manderangni an∙seng baljokanina simsake, name am∙sandie man∙kujana kingking sal 15-na dontongataniko dakangkugen ineba Kurbah parakataha.
